Bogoši
B ogoši bo a tswalelwa. Se ke polelo ya ka mehla setšhabeng sa Basotho ba lebowa. Ka segagešo, kgoši goba moswaredi wa kgoši o bewa ke bakgoma le bakgomana. Bakgoma ke meloko a ka godimo a ka mošate mola bakgomana e le meloko a ka tlase go ya ka malapa ao ba tšwago go ona. Ka setšo go a dumelelega gore kgoši e be le basadi go ya ka mo e ikwago ka gona. Mo gare ga basadi bao ke timamello fela e ka go tswalela setšhaba kgoši. Gantši timamello e tšwa ka lapeng labo malome a kgoši goba ga rakgadi (ke motswala wa kgoši). Ke ka fao go nago le polelo ya gore 'ngwana malome nnyale dikgomo di boele šakeng'. Dikgomo tša go nyala timamollo di tšwa setšhabeng. Ge timamello e fihla ka difokeng, mello ka moka e a tingwa mo motseng gomme magala a go gotša mello nageng ka moka a tšewa mošate fela.
Letlalo la nkwe, kobo ya bokgoši
Ge timamello e ka hlokofala pele e ka belega ngwana wa mošemane, go nyakiwa moratho wa yona gore a mo thibe legato la mogolo'a gwe kua bogadi. Mosadi yo wa go tšea legato la mogolo wa'gwe wa go hlokofala o bitšwa seantlo. Ge e le gore timamello ga e hwetše thari le ka morago ga maiteko a go e retolla letheka, le gona setšhaba se nyaka moratho wa yona gore a tle go se belegela kgoši. Mosadi yoo wa go nyalelwa go tla go belegela mogolo wa gagwe bana o bitšwa hlatswadirope. Ke timamello fela e kago belega kgoši. Ge kgoši e ka ikela bohunamatolo pele ga ge kgošana e ka gola, go nyakiwa yo mongwe ka mošate gore a dule setulong sa bogoši lebaka la motšwa'o swere. Ge kgoši e ka hlokofala pele e ka ba le ngwana wa mošimane le timamello, go nyakiwa yo mongwe ka mošate gore a tlo belegiša timamello kgoši.
Tshepidišo ya ditaba ka mošate
Ka segagešo, kgoši goba moswaredi wa kgoši o bewa ke bakgoma le bakgomana. Bakgoma ke maloko a ka godimo a ka mošate mola bakgomana e le maloko a ka tlase go ya ka malapa ao ba tšwago go ona. Kgoši ke modingwana wa setšhaba ebile theto goba hlompho e bjalo e tloga e mo swanetše. Ke tshwanelo gore setšhaba ka moka se emelele ge kgoši e fihla gare ga sona.
Kgorong ya mošate
Kgoro ke seripa sa ka mošate seo se dirišetšwago ditiragalo tše di fapa-fapanego tša ka mošate le tša setšhaba ka kakaretšo. Ditiragalo ka moka tša go ama setšhaba di rerwa kgorong ya mošate go akaretšwa le go sekwa ga melato. Go swana le mafapa a mangwe setšhabeng, kgoro le yona e na le melao ya yona. Kgorong banna ba dula ka thokong ya bona, e bile ba emelela ka maoto ge ba bolela. Basadi ba na le bodulo bja bona kgorong ya mošate. Basadi ga ba emelele ge ba bolela kgorong. Banna le basadi ba emelela ka nako ye tee fela ge kgoši e fihlile kgorong. Ke tshwanelo gore ba emelele ge kgoši e fihlile gare ga bona. Kgoši ke mongmabu e bile o tloga a swanelwa ke hlompho yeo a e fiwago ke setšhaba sa gagwe.
Bagale
Oliver Kgadime Matsepe, goba O.K. Matsepe ke o balwa le bagale ka karolo ye a e kgathilego tšwelopeleng ya polelo ya Sesotho sa Leboa. O gafetše bophelo bja gagwe ka moka bongwading bjo bo dirilego gore e be mogale le lehono le. O. K. o belegwe ka ngwaga wa 1932 ga Kgoši Hlakudi Matsepe kua Nebo, Transvaal ya maloba. O tsene sekolo Ga-Matsepe le Botšhabelo gomme o feditše mphato wa gagwe wa marematlou ka mokgwa wa go ithuta a le gae ka ngwaga wa 1955. Ka ngwaga wa 1956 o ile a šoma Lefapheng la Bantu Administration, a šoma mafelong a mangwe a a fapafapanego. Matsepe a re go lealea ga gagwe; ge a tsena ka mo a tšwa a šoma e be e le ge a hwetša sebaka sa go ngwala. Puku ye a e ngwadilego ya mathomo ke Kgorong ya Mošate. E ile ya phatlalatšwa ka ngwaga wa 1964 gona mo Afrika Borwa. O ile a tlotlwa ka sefoka sa Samuel Edward Mqhayi go tšwa go Akademie. Ao e bile mathomo mayo. Matsepe o ngwadile mehuta ye e fapafapanego ya dingwalwa; go thoma ka direto go fihla ka dipadi. Tše dingwe tša dipadi tše a di ngwadilego ke Meokgo ya Bjoko , Lešita Phiri , Kgotla o Mone , Molodi wa Thaga , Todi ya Dinose , Molodi wa Mogami , Letšofalela , Kgati ya Moditi , Tšhelang Gape . Bao ba mo tsebago ba re ke ketapele bangwading ba Sesotho sa Lebowa.
Mathomong
